Armónias?-Las stórias de tie Purdência II

Tie Purdência ie mi zelosa i mi trabalhadeira; gusta de tener todo i mesmo que las outras ties zirran an nun fazer pan, eilha amassa todes ls quinze dies ua fornada de pan trigo, tan fulheiro que dá gusto anterrar n el la faca i partir ua torrada que más parece ua trasga.
Eilha nun se deixa bancer pulas pantemineirices de la manteiga i de l lheite.
Todas las purmanhanas fai ua torrada bárbara, unta-la com toucino i anquanto la torrada se fai al lhume, pon tamien a calcer um cacharro de bino i quando acaba l deseiuno está burmelhica i pronta pa l trabalho.
Até alhá pa las trés de la tarde nun precisaba d almorçar, nien de l fazer, nun fura l sou Filismiano que nun ie nien para quemer nien para trabalhar, cum diç. Eilha bien s´ anrezina, mas pouco l bal porque diç qu´el só tenie halbelidade para l fazer garotos. Agora iá nien para isso, iá stá bielho como um cholo rebantado al fin de l Einbierno.
Naciram dezuito filhos, fuora ls qu´ amubiu. Cada beç que se l "esbarrulhaba la casa"ls garotos de la scuola lhougo dezien: Tie Purdência iá tubo outro nino, bámos l a ber?
Bibos tem cinco, mas casoram todos noutros lhugares.
Mal nacie un, el amprenhaba-la lhougo i apuis yá nun tenie lheite para ls criar i cume diç agora, "naquel tiempo nun habie nada pal dar i you tenie que l dar batatas maçcadas". Por fuertes que fúren ou que tebissan muita buntade de bibir, cun batatas mascadas, quedabun c´ua barriga que nien uns ódres i murrien-se lhougo.

Bá, mas bamos alhá a la stória que antressa i quedan ls ninos para outra beç.
Cume you iba dezindo, tie Purdência ie ua safra pa l trabalho. Eilha cria pitos i coneilhos, ceba cochinos, anquanto nun fai friu cria parros no chafurgo de la Funtásia, perús i sien falar nun tagalhico de canhonas qu´ acumpanhan las bacas pu ls cerrados.

"Ie para dar a ls mius filhos i pena tengo you que ls mius nietos nun lheban más, qu eilhes purende a fuora só coman merdas. Eiqui a trás la filha de Chico Pandorco até me dixo que por ende nun sei onde, angurdaban ls frangos cun armónias ou que caralho era, que you nun antendo nada disso. Diç que estão criados num mês!...Tal eilhes saliran"!...

" Armónias... que raio de berdura ou farina será essa?..."